Биотехнологии в Беларуси успешно развиваются – доктор биологических наук, профессор ПолесГУ

Опубликовано пт, 2023-11-10 12:30 пользователем osot

Доктар біялагічных навук, прафесар Палескага дзяржаўнага ўніверсітэта Віталь Нікандраў: «Калі нарэшце вучоны ўзбіраецца на вяршыню, то бачыць містыкаў, якія стаяць там вякамі».

Адна з самых маладых вышэйшых навучальных устаноў краіны — Палескі дзяржуніверсітэт: адкрыты ў 2006 годзе. З пяці факультэтаў у абітурыентаў вельмі запатрабаваны біятэхналагічны. Славіцца ён, як і сам ПалесДУ, прафесарска-выкладчыцкім саставам. Асаблівую цікавасць выклікаюць лекцыі прафесара, доктара біялагічных навук Віталя НІКАНДРАВА. Шлях яго ў навуку пачаўся ў Віцебскім ветэрынарным інстытуце. На Усесаюзнай канферэнцыі студэнтаў сельскагаспадарчых ВНУ яго эксперыментальная работа пра ўплыў солей ванадыю на біяхімічныя працэсы ў арганізме трусоў заняла другое месца. А навуковыя даследаванні двойчы (адзіны выпадак такога роду) адзначаліся медалямі Міністэрства адукацыі СССР «За лепшую студэнцкую навуковую работу». Як выдатнік вучобы, атрымаў накіраванне ў аспірантуру. Паспяхова скончыў яе і абараніў кандыдацкую дысертацыю, прысвечаную ўздзеянню ядахімікатаў на рэакцыю абмену ў жывёл. Навуковае даследаванне стала ў СССР базай дапушчальных канцэнтрацый такіх рэчываў у корме.

У няпоўныя трыццаць гадоў малады вучоны ўзначаліў лабараторыю прыкладной энзімалогіі НДІ эпідэміялогіі і мікрабіялогіі Міністэрства аховы здароўя Беларусі. Там разам з калегамі распрацоўваў «Цэліазу», прызначаную для лячэння трамбозу ў чалавека. За дзевяць гадоў навукоўцы давялі справу да маштабнага выпуску ўнікальнага медпрэпарата. Такога поспеху не дасягнулі ні ў адной рэспубліцы былой вялікай краіны.

Вучоны падрыхтаваў і абараніў доктарскую дысертацыю і стаў працаваць у Інстытуце фізіялогіі Нацыянальнай акадэміі навук.

Яшчэ ў 1980-я ён прадказаў наяўнасць гістыдзінаспартатных пратэіназ. Толькі праз два дзесяцігоддзі яны былі выяўлены амерыканскімі даследчыкамі. У арсенале прафесара амаль шэсцьсот навуковых работ, больш за палову сотні вынаходніцтваў. Падрыхтаваў дзевяць кандыдатаў навук.

Віталь Мікалаевіч прымае актыўны ўдзел у дзейнасці навуковых і грамадскіх арганізацый краіны і замежжа. Ганаровы прафесар Беларускай дзяржакадэміі ветэрынарнай медыцыны, узнагароджаны нагрудным знакам «Вынаходнік СССР», дыпломам І ступені ВДНГ БССР, спецыяльнай прэміяй, медалямі і граматамі Нацыянальнай акадэміі навук, граматамі і дыпломамі Міністэрства аховы здароўя, Палескага дзяржуніверсітэта і Беларускага дзяржпедуніверсітэта імя Максіма Танка, грамадскіх арганізацый. У 2006 годзе за плённую навуковую дзейнасць удастоены Прэзідэнтам персанальнай надбаўкі.

Читать далее: sb.by